Förum með gát

Nú eru Hollendingar eitthvað tilbúnir að spjalla, þó þeir segist ekki ætla að semja neitt. Bretar hafa lýst því yfir að þeir séu ekki hrifnir af þjóðaratkvæði um Icesave frumvarpið og reyndar virðist stjórnin vera það líka (sbr. skjal á wikileaks). Þegar svo hugsað er til panikarinnar hjá Bjarna Ben í kjölfar höfnunar Ólafs á frumvarpinu, þá virðist hann ekki heldur hrifinn af því að leyfa fólkinu að kjósa. Það er því ekki að ástæðulausu að það vakna hjá fólki grunsemdir um að samið verði um eitthvað, bara til að geta frestað kosningunum.

Hins vegar verða ráðamenn að átta sig á því að það má ekki flýta sér í þessu máli. Tíminn vinnur virkilega með okkur, ég mun skýra það betur. Fyrir utan að við virðumst ekki eiga að borga þetta (skilningur flestra nema Samfylkingarinnar), þá má ekki samþykkja eitthvað á forsendum einhverra heljarinnar sölugróða á eignum Landsbankans. Málið er að við getum ekki litið til þess að ástandið sé liðið og allt sé að komi til með að hækka í heiminum. Það eru váleg ský á sjóndeildarhringnum og við getum ekki sagt að það versta sé yfirstaðið. Það þarf nokkurn tíma til þess ennþá.

Hvað er ég þá að fara? Jú, í dag datt mér í hug að kíkja snöggvast á SP500 vísitöluna og tók þá eftir merkjum sem benda ekki til jákvæðrar þróunar í bandarísku efnahagslífi. Fyrir þá sem ekki vita, þá er SP500 ein af þremur helstu vísitölum á bandaríska markaðnum. Á meðan Dow Jones og Nasdaq eru þær þekktustu, þá eru þær ekki endilega í samhljóm. Þannig flaug Nasdaq upp árin fyrir 2000 en Dow Jones gerði ekki mikið. Svo á meðan Dow Jones flaug upp fyrir 2008, þá var Nasdag ekki á sama flugi. SP500 hefur hins vegar sýnt sig vera nokkurskonar meðaltal þessara tveggja og sýna mjög nána tengingu við markaðinn almennt. Alltént þá gat ég sagt fyrir um bakslagið á bandaríska fjármálamarkaðnum í nóvember 2007.

En skoðum SP500 betur. Þegar vikulega kortið er skoðað (en ég nota kortið fyrir næsta víkjandi mánuð á framvirkum markaði) þá eru þar merki um að skammtímaútlitið sé fyrir lækkun. Þannig hefur vísitalan lækkað niður fyrir viðmiðunarmörkin á uppsveiflunni í kjölfar síðustu lækkunar. Hún hefur aðeins risið, en ekki náð uppfyrir ákveðin hindrunarmörk (resistance) sem má sjá í nóvember og desember 2009.

 

Ef við svo skoðum meðallengdar útlitið (mid-term) útlitið, þá er staðan ekki mikið betri. Þar er vísitalan komin nokkuð niðurfyrir viðmiðunarlínuna og ekki sjáanlegt að hún sé að leitast við að sækja hratt upp. Til viðbótar þessu, þá er hækkun vísitölunnar búin að vera aflíðandi, en það er merki um þreytu í markaðnum. Það eru því allar líkur á að vísitalan muni lækka næstu vikur.

 

En hvað segir langtímakortið þá? Það er aðeins betra útlitið þar en á vikulega kortinu, en samt ekki þannig að maður fari að fagna. Vísitalan var að falla niður fyrir viðmiðunarlínuna í þessum mánuði og þegar litið er til þess að hækkunin frá því að botninum var náð í kjölfar síðasta falls, hefur verið aflíðandi, þá er útlitið vægast sagt ekki gott.

 

Það bendir allt til þess að markaðurinn í BNA sé að fara að gefa sig og þá mun hann ekki falla einn, heldur mun sá breski og líklegast euro markaðirnir falla með. Euro markaðirnir gætu þolað eitthvað högg í viðbót, þ.e. markaðir stóru landanna, en breski markaðurinn mun ekki þola annað högg. Það er hæpið að breska stjórnin muni geta dælt fjármagni inn í bankana á ný, auk þess sem almenningur er líklegur til að mótmæla hraustlega. Þegar svo litið er til stjórnmálakreppunnar í Hollandi, þá er ekki líklegt að það verði um skipulögð viðbrögð af þeirra hálfu. Í slíku falli, þá verður Icesave sem títiprjónn í helv... og því ekki líklegt að menn verði með hugan við það.

Það er því allt sem bendir til þess að tíminn muni vinna með okkur, en ég tel líklegt að við séum að horfa á vikur frekar en mánuði þangað til við fáum fréttir af mikilli lækkun á bandarísku mörkuðunum. Auðvitað er leiðinlegt að slíkt skuli henda þar, en með hliðsjón til aðstæðna okkar á Íslandi, þá mun það verða okkur frekar til lukku en leiða.

Ég gaf út fyrir nokkrum vikum að ég teldi um tvo mánuði í fréttir af bandaríska markaðnum. Þessi skoðun mín á SP500 hefur ekki dregið úr því áliti mínu. Við erum að horfa á mjög skamman tíma.

Icesave fundur á morgun

Athugasemdir

[Guðni Karl Harðarson, 25.2.2010 kl. 00:10]

Það væri flott að fá hjá þér kort með Euro líka eða helst kort þar sem þú ert með saman Euro/markaðina (rautt) á móti SP-500 (blátt).

Ég hef sjálfur kynnt mér svona ýmsar vísitölur og það er svo margt sem spilar þar inn í eins og SMA dagar Williams, Fast STO og margar fleiri. Ég hefði viljað sjá vísitölunar með og (flottast finnst mér að hafa þetta í Candlestick línuriti).

Ég skoðaði í Candlestick: SMA 5 10 og 50 daga saman og svo setti ég MACD 12,26,9 svo setti ég Fast STO %K(14 á móti %D(3)

Svo skoðaði ég RSI. 

Þó þetta virðist vera að falla þá hefur það samt ekki fallið niður fyrir það neðsta í November. Síðan sýnist þetta vera pínu Bullish ennþá. Alla vega er RSI á uppleið aðeins, Fast STO rétta að taka við sér (svarta lína upp fyrir þá rauðu). Það er aðeins MACD sem er dálítið spurningarmerki en þó er svarta línan vel upp fyrir þá rauðu þó bláu merkin séu aðeins rétt að falla.

Síðan eru MA 5 og 10 að ná MA meðala MA 50 daga línunni aftur. Það er lyfting þar því MA 5 er fyrir ofan MA 10 og stendur nálægt MA 50.

Eitt enn: það er stór stjarna þann 7 feb. með löngum hala sem gefur til kynna tímabundin bullish markað. Ég væri ekkert svo viss um fall fyrr en þetta fer niður fyrir það verð sem er í kringum 1060.

[Guðni Karl Harðarson, 25.2.2010 kl. 00:12]

Og ég skoðaði frekar $SPX (S&P 500 Large Cap Index

[Jón Lárusson, 25.2.2010 kl. 08:41]

Blessaður Guðni. Ég sé að þú hefur kynnt þér tæknigreininguna og líkar það vel, enda er það eina leiðin til að geta sagt til um hvert markaðir eru að stefna. Hins vegar þá er alltaf hætta á að menn gleymi sér í indicatorum, en ofnotkun á þeim getur villt manni sýn. Þú nefnir þá marga góða og samkvæmt sumum þeirra þá er enn von. Hún er að mínu viti veik, en von samt. Mín reynsla, sem er nokkur, hefur fengið mig til að líta til einfaldleikans. Einfaldar trendlínur og support/resistance hafa reynst happadrjúgstar við greiningar, en indicatorar hafa verið ágætis stoðgögn varðandi tímasetningar séu þeir notaðir í hófi. En ég verð að segja að til langstíma þá er útlitið ekki beisið.

Ég er sammála þér með kertastjakana, þeir gefa margar upplýsingar til viðbótar sem styrkja grunn einkennin. Hins vegar þá er ég ekki að sjá neina góða stjörnu í febrúar, en hún þarf helst að vera í toppi eða botni til að geta sýnt raunverulegan viðsnúning og styrk (viðsnúningur úr tímabundnu falli eða risi er líka styrkleikamerki). Það er búið að vera tímabundinn viðsnúningur síðan bakslagið eftir áramótin, en ég tel þann viðsnúning vera að missa þrek. Það er mikil vinna í að byggja upp vísitöluna aftur og þá þarf hún að ná vel uppfyrir 1.120 til að geta talist marktæk. Þegar dagskoritð er skoðað ásamt því sem er að gerast í vikulega kortinu og svo aftur hvernig mánaðarkoritið er að taka sig. Þá er framundan skellur. Svo er bara spurningin hversu mikill hann verður, en ég tel hann geta orðið nokkuð stífan.