Hættum að lufsast

Það kemur manni svo sem ekki á óvart að ekki skuli vera upplýst um neitt það sem þarna er á ferðinni. Það er nú bara þannig að ekkert er gert á hinu háa Alþingi nema það komi að einhverju leiti til með að hjálpa okkur inn í ESB.

Hvers konar félagsskapur er það sem við erum að sækjast í, félagsskapur sem hótar að eyðileggja vinnu með AGS og umsóknarferli í ESB nema við lufsum út í horn og látum misnota okkur. Ég persónulega tel okkur ekkert hafa þarna inn að gera.

Það er líka alveg augljóst að það er enginn að hjálpa okkur baun. Við fáum úrræði sem aðeins sökkva okkur dýpra í fenið og eru aðeins ætluð til bjargar fjármálastofnunum hér heima og erlendis. Ég tel okkur engu hafa að tapa. Hættum að daðra við ESB eins og tík á lóðaríi og sendum AGS heim með þessi lán sem hann hefur hent til okkar á okurvöxtum. Lán sem við erum hvort eð er ekkert að nota.

Hættum að horfa til útlanda, enda er þar enga hjálp að fá. Horfum hingað innanlands og lítum til þeirra verka sem þarf að vinna. Útlendingarnir, sem ekkert gera nema hóta okkur, geta bara átt sig. Það eru líka fleiri útlendingar til en þessir evrópsku, útlendingar sem ekki eru að hóta okkur.

Förum núna að gera hlutina sem hjálpa okkur í stað þess að fórna öllu hér innanlands í von um eitthvað sem í raun virðist ekki vera til staðar. Ég spyr mig hreinlega, hvers virði er að lufsast inn í ESB ef landið er auðnin ein. Þeir sem ekki vilja, eða hafa trú á þessu landi og þessu samfélagi, geta bara keypt sér miða með Flugleiðum og farið. Ekki er ég að syrgja þá.

Ísland býr yfir miklum auðlindum og harðduglegu fólki. Við getum leyst okkar mál sjálf, við verðum bara að hafa trúnna á okkur til þess. Ég persónulega er ekki í nokkrum vafa um getu okkar og hæfni. Við verðum bara að gera hlutina á okkar forsendum ekki annarra. Við erum Íslendingar, en þeir sem telja sig vera eitthvað annað og betra, geta bara farið og leitað uppi sína líka.

Þingmenn fá ekkert að vita

Athugasemdir

[Jónas Harðarson, 30.5.2009 kl. 20:50]

Rétt hjá þér!!!!  Afhverju áttum við Íslendingar okkur ekki á því að það eru Bretar og Evrópa sem þarfnast okkar ekki öfugt

Það erum við sem sitjum á GULLKISTUNNI og það vita þeir , við þolum alveg að segja þessum þjóðum að taka sitt lánafyrirtæki (AGS) og það sem því fylgir og troða því þar sem sólin ekki skín!

Og þó svo að þeir setji viðskiptabann á okkur ef við borgum ekki  Bretum og fl.. eftir nokkra mánuði án fisks frá okkur kæmu þeir vælandi til baka.. þeir eiga engan fisk sjálfir

Ég þoli alveg persónulega að éta bara fisk næstu tvö árin ef útí það færi

Evrópubandalagið fengi þá allavegna ekki landið mitt (og auðlindirnar) á einhverjum fölskum forsendum

Áfram Ísland 

[Jón Lárusson, 31.5.2009 kl. 14:40]

Það eru um 300 milljónir manna í ESB og eitthvað svipað í BNA. Það eru hins vegar fleiri milljarðar manna á jörðinni. Að fórna öllu hér heima til að opna fyrir þessa 300 m. í ESB, er það sama og að loka fyrir alla milljarðana sem fyrir utan eru.

Kínverjar hafa komið til okkar með vangaveltur um fríverslunarsamning. Væri ekki gott að geta komist inn á þann markað? Í ESB mættum við ekki standa í þessum viðræðum, það væri hreinlega bannað.

Vatn og fiskur eru auðlindir sem fara dvínandi í ESB, afhverju að gefa þeim þetta á silfurfati. Þeir koma til með að versla við okkur hvort sem er.