Nokkur atriði til umhugsunar

Þetta skýrir hversu hratt var gengið til verka í október og hversu lítið heyrðist frá ráðherrunum. Þetta var allt fyrirfram ákveðið og planið til. Það að ráðherrar skuli svo skella allri skuldinni á Seðlabankann sýnir bara hræsnina. Ég er ekki að segja að Seðlabankinn sé saklaus í þessu öllu, heldur brást kerfið í heild.

Það sem vekur hjá mér athygli er að þetta er ekki eitthvað plan sem Davíð kokkaði upp, heldur var fenginn erlendur "sérfræðingur" til að vinna að þessu. Svo í kjölfarið er fenginn erlendur "sérfræðingur" til að reka seðlabankann og vextir látnir vera í toppi þrátt fyrir enga verðbólgu. Er ekki komið nóg af þessari minnimáttarkennd gagnvart útlendingum. Það þarf alltaf að grípa til þeirra ef eitthvað þarf að gera. Útlendingar eru ekkert betri en við, þeir ólust bara upp við annað tungumál. Ef þeir væru svona miklu betri en við, þá væri heimurinn ekki í þessu rugli. Losum okkur við erlendu "sérfræðingana" og fáum Íslendinga til að vinna þessa vinnu. Við eigum fullt af mjög kláru fólki til að vinna þetta.

Annað er að fyrst farið er út í þessa vinnu, þá hljóta menn að hafa verið meðvitaðir um að bankarnir væru á barmi örvæntingar. Ef þú telur allt vera í lagi, þá ertu ekki mikið að undirbúa þig fyrir stórslys. Af hverju var ekki brugðist við til að sporna við því að allt færi til andsk... í stað þess að búa sig undir það hvað ætti að gera þegar það gerðist. Er ekki betra að reyna að koma í veg fyrir klúður heldur en að bíða bara og vera tilbúinn þegar það gerist.

Þá komum við að rúsínunni í pylsuendanum. Það er hverjir voru á staðnum og fengu upplýsingarnar. Ráðuneytisstjórar forsætis-, fjármála- og viðskiptaráðuneytis voru upplýstir um þetta, sem þýðir að gera má ráð fyrir að ALLIR ráðherrar, jafnt frá Sjálfstæðisflokki sem og Samfylkingu voru meðvitaðir um þetta allta saman. Það væri harla ólíklegt að ráðuneytisstjórarnir hafi ekki upplýst ráðherrana um þetta og ég efast um að Björgvin, Geir og Árni hafi bara klórað sér í kollinum og látið gott heita. Auðvitað voru allir ráðherrar Samfylkingarinnar upplýstir um þetta, sem og ráðherrar Sjálfstæðisflokksins. Svona hlutir eru ræddir. Það að ekkert skuli hafa verið gert, er hins vegar til skammar ÖLLUM þeim sem voru í ríkistjórn. Það er augljóst að hér trúðu menn á 70% regluna "70% allra vandamála leysast af sjálfu sér - 70% árangur er ekki slæmur", regla sem er táknræn fyrir þá sem ekki treysta sér til neins og var einkennandi fyrir ríkistjórn Geirs H. Haarde.

Það er rétt, við bjuggum við vanhæfa ríkistjórn. Vandi okkar í dag liggur hins vegar í því að helmingur hennar situr áfram. Sá helmingur hefur svo ekkert frekar til málanna að leggja en að afsala sér ákvörðunarvaldi þjóðarinnar til erlendra "sérfræðinga".

Það er kominn tími til að við hættum þessu rugli og förum að vinna í okkar málum. Það gerir það enginn fyrir okkur. Við ein getum losað okkur út úr þessu og við ein verðum að hefja verkið. Að halda það að hingað muni streyma hersing riddara á hvítum hestum undir lúðraþyt evrópskra sambandssinna, er tákn um vonleysi og vantrú á okkur landsmenn. Við Íslendingar verðum að standa saman í því að losa okkur undan þessu ástandi og við verðum að gera það núna.

Áætlun ef bankar færu í þrot

Athugasemdir

[Bjartur (IP-tala skráð) 14.5.2009 kl. 16:46]

Næsta skref væri að dusta rykið af Gamla sáttmála og klára bara dæmið.

"Í nafni föður ok sonar ok heilags anda.

Var þetta játað ok samþykt af öllum almúga á Íslandi á Alþingi með lófataki:
At vér bjóðum (virðuligum herra) Hákoni konungi hinum kórónaða vára þjónustu undir þá grein laganna, er samþykt er milli konungdómsins ok þegnanna, þeirra er landit byggja.
Er sú hin fyrsta grein, at vér viljum gjalda konungi skatt, ok þingfararkaup slíkt sem lögbók váttar, ok alla þegnskyldu, svá framt sem haldin er við oss þau heit, sem í móti skattinum var játað. Utanstefningar viljum vér aungvar hafa, utan þeir menn, sem dæmdir verða af várum mönnum á Alþingi í burt af landinu. Item at íslenzkir sé lögmenn og sýslumenn á landi váru af þeirra ættum, sem at fornu hafa goðorðin upp gefit. Item at sex hafskip gangi á hverju ári til landsins forfallalaust. Erfðir skulu ok upp gefast fyrir íslenzkum mönnum í Noregi, hversu lengi sem staðið hafa, þegar réttir arfar koma til eðr þeirra umboðsmenn. Landaurar skulu upp gefast. Slíkan rétt skulu hafa íslenzkir menn í Noregi sem þeir hafa beztan haft. Item at konungr láti oss ná íslenzkum lögum ok friði eptir því sem lögbók váttar ok hann hefir boðið í sínum bréfum, (sem guð gefr honum framast afl til). Jarl viljum vér hafa yfir oss meðan hann heldr trúnað við yðr, en frið við oss. Halda skulum vér ok vorir arfar allan trúnað við yðr meðan þér ok yðrir arfar halda við oss þessa sættargerð, en lausir, ef rofin verðr af yðvarri hálfu at beztu manna yfirsýn.

Anno M. ijc lxiij.
Hér eptir er eiðr Íslendinga.
Til þess legg ek hönd á helga bók ok því skýt ek til guðs at ek sver herra Hákoni konungi ok Magnúsi konungi land ok þegna ok æfinlegan skatt með slíkri skipan ok máldaga sem nú erum vér á sáttir orðnir ok sáttmálsbréf várt váttar.

Guð sé mér hollr, ef ek satt segi, gramr ef ek lýg. "