Verðmæti peninga

Það er sumt sem ætti ekki að koma manni á óvart. Reyndar kom Hreiðar á óvart, hvort það er vegna þess að hann gleymdi að gera kröfu í búið, eða bara hafði vit á því að vera ekki að rugga bátnum. En Hreiðar virðist samt vera fréttin í fréttinni.

Þessar kröfur eru skýrt dæmi um það hvað við höfum ranga hugmyndir til peninga. Í samfélaginu á allt að snúast um peninga, eins og þeir séu einhver verðmæti. Peningar eru hins vegar verðlausir í sjálfu sér og við verðum að fara átta okkur á þeirri staðreynd, annars munum við ekki ná okkur á strik aftur.

Ekki taka þetta sem svo að ég telji peninga af hinu illa og að þeim ætti að koma fyrir út í hafsauga. Það sem ég er að reyna að benda á er að peningar eru verðlausir í sjálfu sér, þeir eru bara ávísun á verðmæti. Ekki ósvipað og afslátta miði eða bara strætómiði. En á meðan afsláttamiðar og strætómiðar eru venjulega ávísun á afmörkuð verðmæti, t.d. 10% af gúrkum eða ferð í breiðholtið, þá eru peningar ávísun á víðara úrval verðmæta. En þetta víðara úrval gerir peningana ekkert verðmeiri en hvað annað.

Peningar hafa bara einn tilgang og það er að auðvelda okkur að skiptast á þeim undirliggjandi verðmætum sem þjóðfélagið skapar og því er fáránlegt að búa þeim einhver verðmæti sjálfum. Til dæmis er út í hött að við skulum þurfa að kaupa peninga dýrum dómi til þess eins að geta skipst á undirliggjandi verðmætum. Þetta er sérstaklega fáránlegt þegar hugsað er til þess að við "kaupum" fjármagnið af bönkum sem búa það til úr engu og selja okkur með hárri álagningu. En fyrir þá sem vilja skoða betur eðli peninga bendi ég á vef Umbótarheyfingarinnar.

Það er kominn tími til að við Íslendingar horfum á hlutina frá réttu sjónarhorni og byggjum hér upp samfélag sem er grundvallað á eðlilegum árherslum, áherslum sem liggja til virðingar til handa náunganum og raunverulegum verðmætum.

Sigurður gerir launakröfu

Athugasemdir

[Guðmundur Ásgeirsson, 22.1.2010 kl. 16:20]

Sæll Jón og takk fyrir síðast. ;) Ég er mjög sammála þessu viðhorfi, peningar eru bara pappír alveg eins strætómiðar. Verðmætið felst í ferðalaginu, ekki farseðlinum!

[Þorsteinn T Ragnarsson, 22.1.2010 kl. 16:53]

Þetta er alveg hárrétt og mikið sannleiksgildi í þessu. Væri óskandi að fleiri hugsuðu svona.

[Gísli Ingvarsson, 22.1.2010 kl. 23:25]

Það er nú samt þannig að því dýrari verði sem peningarnir eru fengnir þeim mun verðmætari eru þeir. Hefur einhver reynt að kaupa karamellur fyrir matadorpeninga? Á bak við peninga er vald og það er hægt að vinna fyrir því og það er hægt að stela því. Það er heilmikil siðfræði á bak við peninga. Að endingu snýst verðgildið um traust. Það er það sem Íslendinga skortir í dag. Það er það sem okkur er sagt að sé á bak við frasann "að íslendingar muni standa við skuldbindingar sínar".

[Sigurður Haraldsson, 22.1.2010 kl. 23:42]

Traust er það sem ráðamenn okkar hafa ekki né nokkur banki sem fór á hliðina það er vandamálið. Ekki vex traustið með framkomu þessara manna siðblindu og græðgi.

[Jón Lárusson, 23.1.2010 kl. 21:58]

Takk sömuleiðis Guðmundur ;). Þorsteinn takk fyrir innlitið og svona til hughreystingar, þá eru fleiri sem hugsa svona.

Gísli, peningar eru verðlausir, þeir eru bara ávísun á undirliggjandi verðmæti. Ein spurning: Ef þú mættir velja að eiga alla peninga í heiminum eða öll verðmæti í heiminum, hvort myndir þú velja?

Sigurður, ég er alveg sammála þér, það er brunaútsala á trausti hjá ráðamönnum þessarar þjóðar og helstu stonfunum.